Ғолибони нахустин Синнамобазми байналмилалии «Дидор» муайян шуданд


Ғолибони нахустин Синнамобазми байналмилалии «Дидор» муайян шуданд

Шоми 20 октябри соли равон дар «Хонаи кино», дар кинотеатри «Зебуннисо»-и шаҳри Душанбе маросими ҷоизасупории ғолибони Озмуни байналмилалии филмҳои мустанад ва Озмуни филмҳои тоҷикӣ баргузор гардид. Дар бахши Озмуни байналмилалӣ Шоҳҷоизаи беҳтарин филми пурраметраж ба коргардони афғон Саҳро Мусавӣ-Монӣ барои филми «Ҳазор духтаре мисли ман» (84 дақиқа) дода шуд. Қаҳрамони филм Хотираи 23-сола алайҳи суннатҳои мамлакаташ мехоҳад, ки падари таҷовузкорашро муҷозот кунад. Коргардони ҷавон хатмкардаи Донишгоҳи ҳунарҳои Лондон мебошад.
Филми кӯтоҳметражи «Охири замин»-и когардони Русия Дмитрий Степанов ба Шоҳҷоизаи филмҳои беҳтарини кӯтоҳмуддат сазовор дониста шуд. Филми мазкур 20 дақиқа буда, аз зиндагии гӯркобҳои гӯристони шаҳри Сергей Посад Саша ва Юра, ки 30 сол боз ба ин кор машғуланд, нақл мекунад.
Шоҳҷоизаи беҳтарин филми Озмуни филмҳои тоҷикӣ ба коргардони тоҷик Файзулло Файзов барои филми «Устод Кимёгаров» дода шуд. Филми мазкур ба ҳаёт ва эҷодиёти коргардони машҳур Борис Кимёгаров, ки кинои тоҷикро ба арсаи байналмилалӣ баровард, бахшида шудааст. Дар филм дӯстон ва шогирдони Борис Кимёгаров дар бораи когардон ҳеле самимӣ ҳарф мезананд. Махсусан суханронии когардони машҳури тоҷик, раиси вақти Иттифоқи кинематографистони Тоҷикистон, Иттифоқи кинематографистони Иттиҳоди Шуравӣ Давлат Худоназаров ва киношинос, доктори улуми фалсафа Саъдулло Раҳимов хеле муассир аст.
Дар бахши Озмуни филмҳои тоҷикӣ 8 филм ширкат дошт ва филми мустанади Дилошӯб Орифзода «Умед» (16 дақиқа) бо ҷоизаи вижаи Дафтари Швейтсария қадрдонӣ гардид. Филм аз мушкилоти камбуди оби нӯшокӣ ва кишоварзӣ дар шаҳраки «Бахт»-и ноҳияи Зафаробод нақл мекунад. Бинобар корношоям шудани чоҳҳои обкаш мардум чанд сол аст, ки аз оби ошомиданӣ танқисӣ мекашанд. Читать далее

ФИЛМБАРДОРИИ МУСТАНАД ДАР КИШВАРҲОИ МИНТАҚА



ФИЛМБАРДОРИИ МУСТАНАД ДАР КИШВАРҲОИ МИНТАҚА

20-уми октябр дар доираи озмуни аввалин Синамобазми байналмилалии филмҳои мустанади «Дидор» шаҳри Душанбе мизи гирд дар мавзӯи «Масоили синамои мустанади муосир дар кишвари ҷудогона» бо иштироки ҳайати доварон, когардонҳо ва киношиносон баргузор гардид. Киношинос, доктори улуми фалсафа Саъдулло Раҳимов ба мизи гирд ҳусни ифтитоҳ бахшида, аз ҳозирин хоҳиш кард, ки дар бораи вазъи филмсозии мустанад дар кишварҳояшон маълумот бидиҳанд.
Нахуст Элҷон Аббосов, коргардони филми «Мерос» дар бораи вазъи филмбардории мустанад дар Ӯзбекистон ҳарф зад. Ӯ гуфт, ки аз ҷониби ҳукумат кинои миллӣ дастгирӣ меёбад. Албатта, дар ин ҳол мавзӯи филмҳои мустанад аз боло супориш дода мешавад. Ин филмҳо бештар портретӣ мебошанд. Филмҳои мустанади муаллифӣ аз ҷониби коргардонҳои мустақил, ки ангуштшуморанд, наворбардорӣ мешавад. Албатта, онҳо аз ҷониби мозмонҳои байналхалқӣ ва сафоратҳо маблағгузорӣ мегардад.
Нигора Ғаниевна, намояндаи Ӯзбекистон илова кард, ки филмҳои супоришии вақтҳои охир мавзӯи таърихиро фаро мегиранд.
Ҷавоншер Ҳайдарӣ, раиси Иттифоқи кинематографистони Афғонистон дар бораи вазъи мустанадсозӣ дар кишвараш ҳарф зада гуфт, кинои мустанад аз ҷониби ҳукумат ҳамаҷониба дастгирӣ меёбад. Новабаста аз 40 сол боз ноором будани кишвар филмҳои мустанад сохта мешаванд.
Масалан, як моҳ қабл филми мустанади хонум Саҳро Каримӣ, директори «Афғонфилм» «Ҳаво, Марям, Оиша» ба Ҷоизаи «Оскар» пешниҳод шуд.

Читать далее

ДУХТАРИ МУЛЛО



ДУХТАРИ МУЛЛО
18-уми октябр дар доираи озмуни байналмилалӣ филмҳои мустанади Эрон «Аҳли об» (30 дақиқа) — коргардон Озода Бизаргитӣ, «Дар ҷустуҷӯи Фарида» (88 дақиқа) — коргардонҳо Озода Муссавӣ ва Куруш Атоӣ, «Духтари мулло» (72 дақиқа) коргардонҳо Ҳасани Сулҳҷӯ ва Маҳдияи Содот Мирҳабибӣ намоиш дода шуд.
Когардони филми «Духтари мулло» Ҳасани Сулҳҷӯ масъули барномаи аппарат»-и Телевизиони форсии Би-Би-Си мебошад. Ӯ дар нишасти матбуотӣ гуфт, ки вақте наворҳои хонводагии Маҳдияро дид, хеле муассир шуд ва аз пайи тадвини онҳо ба ҳайси як филм шурӯъ кард. Баъди заҳмати яксола тадвини филм ба анҷом расид. Филми мазур аввалин маротиба ҳафтан пеш дар Кореяи Ҷанубӣ намоиш дода шуд ва ҳоло чунин имконият ба тамошобинони Синамобазми «Дидор» даст дод. Читать далее

НАХУСТИН СИНАМОБАЗМИ БАЙНАЛМИЛАЛИИ ФИЛМҲОИ МУСТАНАДИ «ДИДОР» ОҒОЗ ГАРДИД



НАХУСТИН СИНАМОБАЗМИ БАЙНАЛМИЛАЛИИ ФИЛМҲОИ МУСТАНАДИ «ДИДОР» ОҒОЗ ГАРДИД

Маросими ифтитоҳи аввалин Синамобазми байналмилалии филмҳои мустанади «Дидор» дар Рӯзи кинои тоҷик -16 октябри соли равон, дар толори бузурги кинотеатри «Зебуннисо» бо суханронии ёрдамчии Президенти Тоҷикистон оид ба масоили иҷтимоӣ ва робита бо ҷомеа Абдуҷаббор Раҳмонзода оғоз гардид. Мавсуф дар бораи рушди кинои тоҷик ҳарф зада гуфт, ки ба рушди санъати мазкур ҷаноби олӣ, Президенти Тоҷикистон Эмомалӣ Раҳмон таваҷҷуҳи зиёд зоҳир мекунанд.
Пас аз ин собиқадорони кино Ҳунарпешаи Халқии Тоҷикистон Ҳабибулло Абдураззоқов, наворбардори шинохтаи тоҷик Георгий Дзалаев ва дигарон бо нишони «90-солагии кинои тоҷик» қадрдонӣ гардиданд.
Синамобазми имсолаи «Дидор» ба поси хотири мустанадсози тоҷик, иштирокчии ҶБВ, наворбардор Мамадқул Арабов бахшида мешавад. Пас аз расми ифтитоҳ намоиши филми коргардони тоҷик Шарофат Арабова «Падар: ба хотираи Мамадқул Арабов» оғоз гардид. Шарофат пеш аз оғози филм гуфт, ки ӯ наврас буд, ки падараш охири соли 1999 аз олам чашм пӯшид. Ӯ филми мазкурро аз рӯи хотираи ҳамкорону дӯстони падар ва пораҳои филми вай сохтааст.

Соати 14 дар толори бузурги кинотеатри ба номи Зебуннисо озмуни байналмилалии филмҳои мустанад шуруъ шуд. Дар ин бахш филмҳои коргардонҳои Озарбайҷон намоиш дода шуд. Аз ҷумла, филми мустанади коргардони ҷавон Лайлӣ Гафарова «Замоне дар Шанхай» (35 дақиқа) пешкаши бинандагон гардид. Филми мазкур 35 дақиқа тӯл кашида аз рӯзгори маҳаллае бо номи Шанхай дар шаҳри Боку нақл мекунад. Сокинони ин маҳалла асосан мардуми камбизоат буда, аз байни маҳалла роҳи оҳан мегузарад. Поездҳо аз дари хонаи сокинони ин маҳалла ҳаракат мекунад. Филмбардори олмонӣ ба ин ҷо омада, филми ҳунарие мегирад. Пас аз чанде хонаҳои назди роҳи оҳанро чаппа мекунанд. Зеро ҳаракати поездҳо, ки аз ин ҷо ба Гурҷистон мераванд барои сокинон хатарнок аст.
Когардони филм Лайлӣ Гафарова дар нишасти матбуотӣ гуфт, ки аслан гирифтани чунин як филмро дар гӯшаи хаёлаш ҳам надошт. Вале ҳангоми ёварӣ ба филмбардорони олмонӣ ин идея ба сараш омад. Воқеан, филми мазкур хеле табиӣ аз хаёти чунин махаллаҳо, ки қариб дар ҳамаи шаҳрҳои бузург ҳастанд, нақл мекунад.

Лайлӣ Гафарова зодаи Озарбойҷон буда, дар Ҳолланд бузург шудааст ва дараҷаи бакалавру магистрро дар Белгия гирифтааст.
«Рӯзи таваллуд» ном дошт филми дуюме, ки аз ҷониби мустанадсозони озарӣ ба озмун пешниҳод шуда буд. Коргардони филми мазкур Ҳилол Байдаров мебошад. Филм 63 дақиқа дар бораи як рӯзи зани танҳое нақл мекунад, ки зодрӯз дорад. Ӯ чашм ба тиреза интизор аст, ки касе дарашро мекӯбад. Рӯз шом мешавад, вале касе ҳатто зангаш намезанад. Қаҳрамони филм ҳарфе намегӯяд. Вале садои об ва зарфҳо хеле гӯшхарошкунанда аст. Зан обро маҳкам мекунад, вале боз чанд лаҳзаи дигар садои гӯшхароши он меояд. Филм хеле тӯлонӣ ва дилбазан аст. Шояд ин аз он сабаб бошад, ки филмноманавису наворбардору коргардон якест ва ӯ филмро на барои тамошобин, балки барои худ офаридааст.
Воқеан, филми Шарофат Арабова «Падар: ба хотираи Мамадқул Арабов», ки 90 дақиқа аст, низ хеле тӯлонӣ мебошад. Филм аз нақли шаҷараи Арабовҳо дар Бухоро шурӯъ шуда, аз мусоҳибаҳои зиёд ва тӯлонӣ иборат аст, ки онҳоро метавон кӯтоҳу ихчам кард. Ба назари банда Шарофат филми хубе барои тамошои хонаводааш бардоштааст. Вале барои тамошобини оммавӣ он хеле тӯлонӣ ва дилгиркунанда аст. Ҳамчунин ба назари мо ҳоло ҳам лаҳзаҳои зиёде аз хаёти шахсии Мамадқул Арабов номуайян мондааст ва симои воқеии ин наворбардор пурра кушода нашудааст.
Соати 16 дар толори бузурги кинотеатр озмуни филмҳои тоҷикӣ оғоз гардида, ба он филмҳои «Умед»-и коргардон Дилошуб Орифзода, «Ганҷ»-и Меҳрубон Маликов ва филми Олга Ладигина «Бо роҳи тоҷирон ва косибон» пешниҳод шуд.
Нахуст филми «Умед» (16 дақиқа) намоиш дода шуд. Филм аз мушкилоти камбуди оби нӯшокӣ ва кишоварзӣ дар шаҳраки «Бахт»-и ноҳияи Зафаробод нақл мекунад. Бинобар корношоям шудани чоҳҳои обкаш мардум чанд сол аст, ки аз оби ошомиданӣ танқисӣ мекашанд. Филм ҳамагӣ 16 дақиқа буда, дар он чанд нафар сокинони деҳа, собиқ раиси хоҷагии кишоварзӣ, раисони маҳаллаҳо, сокинони оддӣ аз мушкилоти мавҷуда нақл мекунанд. Ҳама умед ба беҳбудӣ мебанданд, вале оё хостаҳои мардуми беоб бароварда мешавад?
Масъалабардорӣ дар филм хуб аст. Вале, мутаассифона, назари ягон нафар шахси масъул вобаста ба мушкилоти об дар филм садо намедиҳад.

«Ганҷ» (27 дақиқа) нахустин филми Меҳрубон Маликов ба ҳайси коргардон буда, аз охири зиндагии устои асбобҳои мусиқӣ қисса мекунад. Он фалсафаи зиндагии як инсони оддии деҳотиро нишон медиҳад. Филм хеле муассиру рангин буда, ба забони шуғнонӣ садо медиҳад.
Филми устоди Донишгоҳи славянии Русияву Тоҷикистон Олга Ладигина «Бо роҳи тоҷирон ва косибон», ки 67 дақиқа аст, аз экспедитсияи этнографии донишҷӯён ба вилояти Суғд нақл мекунад. Доктори илми фалсафа, мудири кафедраи фарҳангшиносии ДСРТ Олга Ладигина филмбардори ҳирфаӣ набошад ҳам, тавонистааст бо филми мазкур тамошобинонро ба таври рангин бо ҳунарҳои мардумӣ дар шимоли кишвар шинос намояд.

Кинофестивали мазкур то 20 октябр идома ёфта, дар доираи он 57 филми кӯтоҳ ва пурраметражи мустанади муаллифӣ пешниҳод мешавад. Аз ҷумла, дар бахши озмуни байналмилалӣ 15 филм, дар бахши озмуни филмҳои тоҷикӣ 8 филм ва 11 филми ғайриозмунии ин бахшҳо пахш мешаванд. Ҳамчунин 6 филми мустанадсозони ҷавони Ӯзбекистон, 6 филми Ҷашнвораи «Артдокфест»-и Русия ва филми мустанади Мамадқул Арабов «Бобоҷон Ғафуров: хориқаи тоҷикон» дар давоми синамобазм намоиш дода мешаванд.
Ба гуфти директори Синамобазми байналмилалии филмҳои мустанади «Дидор» Сафари Ҳақдод дар нахустин синамобазм филмҳои таҳиякардаи мустанадсозони Афғонистон, Британияи Кабир, ИМА, Олмон, Озорбойҷон, Ҳолланд, Эрон, Фаронса, Чехия, Исроил, Русия, Қазоқистон, Қирғизистон, Ӯзбекистон ва Тоҷикистон иштирок мекунанд.
Ба синамобазм филмҳо дар мавзӯъҳои гуногун ва жанрҳои мухталифи мустанади муаллифӣ пешниҳод шудаанд.
Пагоҳ, 17 октябр, соати 12 дар доираи озмуни байналмилалӣ филми коргардони ҷавони тоҷик Далери Имомалӣ «Умар-ако» ва пас аз он филми когардони афғон Саҳро Мусавӣ-Монӣ «Ҳазор духтаре мисли ман» намоиш дода мешавад.
Дар озмуни филмҳои тоҷикӣ, ки соати 16 оғоз мешавад, филми коргардони ҷавон Шоҳҷамшед Умарӣ «Ҳаворӣ», филми «Пудина»-и коргардон Таҳмина Ҳакимова ва филми коргардони шинохта Искандар Усмонов «Бовар дорам, зиндагӣ мекунам, дӯст медорам» пешниҳоди аъзои ҳакамон ва тамошобинон мегардад.
Дар доираи синамобазм 20 октябр баргузории мизи мудаввар дар мавзӯи «Масоили синамои мустанади муосир дар кишварҳои ҷудогона» дар назар аст.
Синамобазми байналмилалии филмҳои мустанади «Дидор» бо дастгирии Ҳукумати Тоҷикистон, сарварии тадорукотии МД «Тоҷикфилм», сарпарастии молиявии Дафтари Шветсария оид ба ҳамкорӣ дар Тоҷикистон, Иттифоқи кинематографистони Тоҷикистон баргузор гардида истодааст.

Ҷовид Муқим

«Дидор»-и филмҳои мустанад дар Душанбе


«Дидор»-и филмҳои мустанад дар Душанбе

IMG_4405

Аз 16 то 20 октябри соли 2019 ба ифтихори 90-солагии кинои тоҷик бо дастгирии Ҳукумати Тоҷикистон, сарварии тадорукотии МД «Тоҷикфилм», сарпарастии молиявии Дафтари Шветсария оид ба ҳамкорӣ дар Тоҷикистон, Иттифоқи кинематографистони Тоҷикистон нахустин Кинофестивали байналмилалии филмҳои мустанад — «Дидор»  баргузор мегардад.

Дар доираи ин чорабинӣ 57 филми кӯтоҳ ва пурраметражи мустанади муаллифӣ намоиш дода мешавад. Аз ҷумла, дар бахши  озмуни байналмилалӣ 15 филм, дар бахши озмуни филмҳои тоҷикӣ 8 филм ва 11 филми ғайриозмунии ин бахшҳо пахш мешаванд. Ҳамчунин 6 филми мустанадсозони ҷавони Ӯзбекистон, 6 филми Ҷашнвораи «Артдокфест»-и Русия ва филми мустанади Мамадқул Арабов «Бобоҷон Ғафуров: хориқаи тоҷикон» дар давоми синамобазм намоиш дода мешаванд.

IMG_4359

Ба гуфти директори Синамобазми байналмилалии филмҳои мустанади «Дидор» Сафари Ҳақдод дар нахустин синамобазм филмҳои таҳиякардаи мустанадсозони Афғонистон, Британияи Кабир, ИМА, Олмон, Озорбойҷон, Ҳолланд, Эрон, Фаронса, Чехия, Исроил, Русия, Қазоқистон, Қирғизистон, Ӯзбекистон ва Тоҷикистон иштирок мекунанд.

Ба синамобазм филмҳо дар мавзӯъҳои гуногун ва жанрҳои мухталифи мустанади муаллифӣ пешниҳод шудаанд. Ба гуфти директори барномасози Синамобазми байналмилалии филмҳои мустанади «Дидор», киношинос, доктори улуми фалсафа Саъдулло Раҳимов як вижагии ин синамобазм дар он аст, ки мавзӯи мавқеи зан дар ҷомеа дар филмҳо нақши аввал касб кардааст ва ҳамчунин аксари таҳиягарони филмҳои пешниҳодшуда низ занҳо мебошанд.

IMG_4366

Дар доираи синамобазм баргузории як мизи мудаввар дар мавзӯи «Масоили синамои мустанади муосир дар кишварҳои ҷудогона» низ ба нақша гирифта шудааст.

Ба гуфти директори Синамобазми байналмилалии филмҳои мустанади «Дидор», раиси Иттифоқи кинематографистони Тоҷикистон Сафари Ҳақдод ҳадаф аз барпо кардани синамбазм ҷалб кардани таваҷҷуҳи ҷомеа ба филмҳои мустанад ва омӯхтани таҷрибаи ҳамдигар мебошад. Зеро солҳои охир қариб дар ҳама кишварҳо ба филмбардории мустанад кам таваҷҷуҳ зоҳир гардида, ҷои онро филмбардории ҳунарии тиҷоратӣ танг карда истодааст. Ба қавли Сафари Ҳақдод филмҳои мустанад оинаи зиндагианд ва воқеияти ҷомеа, зиндагии инсонҳо дар онҳо бозгӯ мешаванд. Филмҳои мустанад хотираи таърихии миллат мебошанд, ки ҳаргиз аҳамияти худро гум намекунанд.

Маросими ифтитоҳи аввалин Синамобазми байналмилалии филмҳои мустанади «Дидор» дар Рӯзи кинои тоҷик -16 октябри соли равон, соати 10 дар толори бузурги кинотеатри «Зебуннисо» бо намоиши филми коргардони тоҷик Шарофат Арабова «Падар: ба хотираи Мамадқул Арабов» оғоз мегардад. Воқеан, синамобазми мазкур ба поси хотири мустанадсози тоҷик, иштирокчии ҶБВ Мамадқул Арабов бахшида мешавад.

 

Ҷовид Муқим

«Журналистикаи чандрасонаӣ» — аввалин китоби дарсии соҳа



«Журналистикаи чандрасонаӣ» — аввалин китоби дарсии соҳа

17 майи соли 2019 китоби дарсии профессори кафедраи журналистикаи байналхалқии Донишгоҳи миллии Тоҷикистон Ҷовид Муқим бо унвони «Журналистикаи чандрасонаӣ» бо теъдоди 200 адад аз чоп баромад. Китоби мазкур аз 168 саҳифа иборат буда, 18 мавзӯи дарсиро фаро мегирад.
Феълан расонаҳои интернетӣ ба як ҷузъи ВАО табдил ёфта, теъдоди хонандагонаш рӯ ба афзоиш дорад. Махсусан, имкониятҳои мултимедиявии расонаҳои интернетӣ хонандагон ва рекламадиҳандагонро ба худ бештар ҷалб карда, барои рушди ин соҳа мусоидат менамояд. Ҳамин аст, ки тахассуси нав — журналисти интернетӣ ба вуҷуд омад ва барои тайёр кардани чунин мутахассисон талабот зиёд аст. Читать далее

ОЗОДИИ СУХАН ВА СОНСУР



ОЗОДИИ СУХАН ВА СОНСУР

3 май дар олам ҳамчун Рӯзи умумиҷаҳонии озодии матбуот озод таҷлил мегардад. Ба назари ман озодии сухан 11 апрели соли равон, ҳангоми ба ҳабс гирифта шудани муассиси сомонаи WikiLeaks Юлиан Ассанж аз ҷониби пулиси Лондон на танҳо дар Аврупои демократӣ, балки дар тамоми олам ба ҳукми фаромӯшӣ рафт. Ҳамон рӯз Мария Захарова, намояндаи Вазорати умури хориҷии Федератсияи Россия оид ба боздошти ин журналисти австралиятабори роҳи ҳақиқат дар фейсбук навишт, ки «Дасти «демократия» гулӯи озодиро буғӣ мекунад». Бале, талх аст, вале ҳақиқат аст ин гуфтаҳо.
Тибқи гузориши созмони Хабарнигорони бидуни марз соли равон Тоҷикистон дар озодии баён 12 зина поин рафта, дар байни 180 кишвар дар мақоми 161-ум қарор гирифтаст.
Ба гуфтаи Йоҳан Бир, масъули дафтари Осиё ва Аврупои созмони Хабарнигорони бидуни марз ба Радиои «Озодӣ» Тоҷикистон ба хотири сахттар кардани фишор болои матбуоти мустақил, маҳдуд кардани сомонаҳо, баста шудани нашрияҳо ва фишор ба рӯзноманигорон ҷойгоҳи соли гузаштаи худро аз даст додааст. Читать далее